الشتاء يعني برتقال، وبرتقال يعني شتاء، معروفة! البرتقال حقيقي فاكهة جميلة قوي، وبتيجي في الوقت اللي بننسى فيه كلنا نشرب مياه بشكل كافي.

 فييجي هو بعصيره الغزير يروينا وبأليافه يريح حركة البطن عندنا. بس حقيقي، مش دي بس فوائد أكل البرتقال. هو له فوائد تانية كتير جمعنها لك في نقط علشان تعرفي إن أكلة ضروري حقيقي خلال فصل الشتاء:

فوائد أكل البرتقال في الشتاء

 

ممتاز للشعر والبشرة

من أهم فوائد البرتقال إن من  أساسيات تكوين البرتقال هو فيتامين C، والبرتقال يقدر يوفر لك 120 % من احتياجك اليومي منه. واللي بيتحول بدخوله للجسم لمنتج قوي لمادة الكولاجين اللي بيحتاجها الشعر والبشرة. ومع فيتامين C، فيه كمان فيتامين أ اللي بدوره بيوفر الترطيب اللي بيحتاجه الشعر والبشرة. ده غير مضادات الأكسدة اللي بتحارب مسببات الشيخوخة. علشان كده، احرصي على تناول برتقالة في اليوم.

البرتقال لتعزيز من صحة القلب

من المكونات القوية في البرتقال هو فيتامين ب6 والبوتاسيوم، مع فيتامين سي. اللي دورهم تحسين أداء القلب عن طريق إنتاج الهيموجلوبين. ده غير الحديد اللي بيقاوم الإصابة بالأنيميا. ده غير إن فيتامين سي بيحافظ على معدلات الكوليسترول في الدم والبوتاسيوم بيحافظ على معدلات ضغط الدم.

يعزز من صحة الأمعاء

زي ما قلنا لك إن البرتقال مليان ألياف، وفيه نوعي الألياف المطلوبة: ألياف قابلة للذوبان في الماء وألياف غير قابلة للذوبان. الأولى فايدتها إنها بتساعد على زيادة البكتيريا النافعة في الأمعاء اللي هي مهمة جدًا لعملية الهضم. أما الألياف غير القابلة للذوبان في الماء، فبتتميز إنها تقدر تمتص المياه من عملية الهضم واللي بدورها بتعمل على منع حدوث الإمساك.

يساعد على تحسين الذاكرة وتحسين النوم

من مميزات وفوائد أكل البرتقال في الشتاء إن المكونات اللي فيه بتساعد على تحسين الذاكرة ووصول الأكسجين للمخ. واللي بدوره بيساعد في الحصول على ذاكرة أقوى ونوم أفضل.

 

يساعد على خسارة الوزن

البرتقال بيتميز بوجود نوعين من الألياف فيه زي ما ذكرنا: واحدة قابلة للذوبان في المياه والتانية غير قابلة للذوبان. 

من مميزات الألياف القابلة للذوبان في المياه إنها بتدي إحساس كبير بالشبع ولفترة طويلة. وده في حد ذاته بيساعد على تقليل كمية السعرات الحرارية المستهلكة خلال اليوم، فبيساعد جدًا على خسارة الوزن. علشان البرتقال فعليًا صديق جيد جدًا في الدايت.

البرتقال لونه بيضفي بهجة مفتقدة في الشتاء، وبطعمه وريحته المنعشة يعتبر هدية الطبيعة لنا في الفترة دي من السنة. خلّي البيت عندك في الشتاء دايمًا فيه برتقال. ونصيحة أخيرة: ما ترميش قشر البرتقال لإنه مليان فوائد فوق الخيال. جففيه واطحنيه واستخدميه كبديل للفانيليا في الكيك أو حتى لتعزيز طعم كيكة البرتقال. وحتى في تنضيف الطيور قبل طبخها، وهتعجبك النتيجة جدًا.