الدكتور عساف الشوبكي
نيروز الاخبارية :
عساف الشوبكي
بصراحة انا مش عارف شو اخبار الحوت
و مش داري وين هو هسا !!
زمان عنه !!
شو صار فيه
زعلان ولا راضي
جوعان ولا عطشان
ذبلان ولا متفح
كيف بدنا نصل اله
انا كمان مشتاق اله.....
يقطع شر دولتك
بتحكي جد يزلمه
، ما البلد مليانه حيتان
معقول بدّور على حوت
وناصبله كمين كمان
والله حزنتنا عليك
لإنه معذبك هالحوت
معقول صرت زينا
معقول انت مثلنا بتحبش الحيتان
طبعاً مو كل الحيتان فاسدين
فيه حيتان نظاف وصالحين بس هذول قلال
دولتك الحيتان الفاسدين مليانين
أعداء البلد، أعداء الشعب
يا ابن الحلال تروحش لبعيد
تعال الحيتان معبين عمان
يا هملالي الهم قصور
والهم علالي وملايين ومليارات
والهم حسابات باميركا واوربا
والهم استثمارات بكل مكان.
الفاسدين ما بيهمهم غير حالهم
مش سائلين عن البلد
مش سائلين خربت ولا عمرت
نهبوا كل شيء خربوها
دمروا اقتصاد الاردن منهم
حيتان النفوذ والقوة
حيتان المناصب والمكاسب
حيتان المواقع والمزايا
حيتان الحظوة والواسطة
حيتان مخدرات
وحيتان سلاح وعتاد
وحيتان غسيل أموال
وحيتان صفقات مشبوهة
وحيتان سرقة المال العام
وحيتان تصاريح عمل
وحيتان دخان ومعسل مغشوش
وحيتان ألعاب ناريه مبردة
وحيتان ماجي مش ماجي
وحيتان حاويات ما بتتفتش
وحيتان حاويات غيروا بياناتها الجمركية
وحيتان مواد تجميلية مسرطنة
و حيتان مواد لا تنطبق عليها المواصفات والمقاييس.
وحيتان مواد تدخل للبلد بالبراطيل او الخاوة. وحيتان مواد تموينية غير صالحة للاستهلاك. وحيتان مواد منتهية مدتها وبيلزقوا عليها ليبل جديد وبيطعموها للناس.
وحيتان بترول ومشتقات نفطية
وحيتان وكالات و مرابح خرافية
وحيتان تأمين بيضحك على الناس
وحيتان تعليم خاص دون المستوى
وحيتان بيع اراضي بصفقات مشبوهه
وحيتان التعامل مع السفارات
وحيتان مكاتب حقوق إنسان و تجسس على البلد
وحيتان تطبيع مع الاعداء من تحت لتحت
وحيتان خيانات وإنحياز للغريب ضد الوطن
وحيتان تجنيس وتوطين وتدليس
وحيتان صفقات شراء قمح غير صالح للإستهلاك البشري
وحيتان عطاءات عربدة وتلزيم
وحيتان مواد أساسية مغشوشة
وحيتان لحوم مجمدة و مبردة بطعم التراب
وحيتان عمولة على كل شيء تشتريه الدوله. وحيتان تعدي على اراضي الدولة والخزينة
وحيتان تجارة الآثار والدفائن
و حيتان النوادي الليلية والخمارات
وحيتان تنظيم وتحويل الشوارع من سكن الى تجاري
وحيتان المناصب والمكاسب
وحيتان التهرب الجمركي
وحيتان التهرب الضريبي
وحيتان دواء مش نافع
وحيتان أفران ومخابز دون المستوى
وحيتان مطاعم غالية للطبقة المخملية
وحيتان شراء الأصوات
وحيتان تزوير الانتخابات.
والأخطر من كل هذول
حيتان كل شيء
(بتوع كله ) على رأي المصريين
حيتان الأخضر واليابس
حيتان المنشار طالع نازل بيوكل
هذول ما بيفرقوا بين حلال وحرام
هذول الحيتان المفسدين
الحيتان اللي خربوا البلد
هذول كبار الفاسدين.
مش معقول دولة الرئيس تكون غايب فيلة
مش معقول انك مش عارفهم
لا مستحيل ما بتعرفهم
دولتك انت بتعرفهم
بس ليكون ما بتقدر تهوب صوبهم
يادولة الرئيس شد حيلك وحاول
حاول تبلش فيهم
تخافش انت نظيف ومش فاسد
إبلش فيهم وفزّعنا معك عليهم
فزّعنا رح يكون كل شرفاء الشعب معك
كُلنا معك عليهم لعيناك ، ابشر يارجل
والله هذول الحيتان اذا حاصرتهم إلا يتحولوا لفيران ونطلعهم معك من جحورهم
بس انت انوي وقول يارب.
د.عساف الشوبكي
