بقلم النائب السابق ميسر السردية

مبارح حلمت حلم تأويله مو زين، لأحد يقول متغطي مو متغطي، واضغاث احلام ومن هالكلام أنا من المؤمنين بتأويل الرؤيا، بس احيانا بتصير مع الإنسان شغلات رغم خصوصيتها ويمكن سطحيتها بس بيحس حاله بدو يدب الصوت من القهر.

كان الصبح عادي، لطيف، بعض مكالمات مع أصدقاء قمة بالذوق، قلت معناته تأويل المنام عدا مبدئيا، بديش التكش بحدا اليوم وكمان مابطلعش برا، برا الدنيا غولة، الكبير فيها بياكل الصغير، فيها الفقراء بيركضوا ركض الوحوش مشان لقمة خبز تالي النهار يطولوها من بين أدين الوحوش وأصحاب الكروش. 

دخلت المخزن عشان آخذ غرض، لقيت رجلّي غرقانة بالمي، كارثة، البيت مفروش بسط عربية"هاند ميد" جداتي، من وين التسريب، هات نقل وزق أغراض لأوصل للسبب قبل الدمار الأكبر، الماسورة تبعت  الكيزر هي المشكلة،اشتغل ولا تشتغل، اتشبصت بين الكماشات ومفاتيح العدة، بنفش الوكت لازم احضر غدا وانظف المطبخ، في ناس بتعافر برا عشان اعيش، شطف، نشر، تشميش وفش شمس، صرت مثل سفينة الورق بنقعة مي... أعدت صلاة العصر مرتين، مش عارفة اركز،... بمناسبة عيد الأم اتمنى من جماعة تمكين المرأة التركيز على تعليم النساء السمكرة والكهرباء..ما بتعرف الأم متى تحتاج حالها فجأة... هسه قعدت بقرأ الكل بيصيح ويلقي للريح من ارتفاع الأسعار.. اتقوا الله إذا لساتكم بتعرفوا الله بالناس يا فجار...عيد أم أرني المواصفات... !!