نيروز الاخبارية :

الدوار الرابع ليس لتصفية حسابات شخصية ولا لتحقيق مصالح شخصية.. 

وبالنسبة للمعلمين، اتحملوني شوي:

١- الحد الأدنى للأجور بالأردن معروف، وزيكم زي غيركم.. شو رأيكم كل نقابة تنزل تسكر الدوار الرابع وتشل حياة ٢ مليون إنسان؟

٢- الحكومة معهاش.. عجبنا ولا ما عجبنا معهاش.. جد وقته؟

٣- من مهندس إلى معلم.. دوامنا كمهندسين أقل ما يمكن ذكره ٨-٥، من ٥ ل٧ أيام بالأسبوع حسب ضمير ضغط الشغل وضمير صاحب الشغل. ويا بندفعله راتبه (اللي عادي يكون أقل من ٣٥٠ دينار) يا أصلا بكون بشتغل تطوع.. وعدد إجازاته من كبيرها ٢١ يوم مع تراكم الخبرات.. إنتو كيف دوامكم؟

٤- نقابة المعلمين.. ولا بعمرها كان إلها دور وطني يذكر.. ولا وقفة واضحة مع مطالب شعبية عامة.. وأنا كمواطن أردني حقي يساوي حقكم بالشارع، بحكيلكم مش مستعدة اتعطل أنا وغيري صباح يوم خميس عشانكم، الرابع مش الكم لحالكم.. 

٥- بعيداً عن جميع ما ذكر.. إعملوا اللي عليكم قبل ما تطلبوا اللي الكم.. في جيل كامل بين إيديكم.. وشايفين نتائج جهودكم الجبارة، بغض النظر عن أوضاعكم المالية (التي لا تختلف عن أوضاع غيركم).. ما حدا جبر حدا يشتغل.. 

أيها المعلم الجليل.. الطلاب وأنت على الدوار وين؟!

وشكراً

#نقابة_المعلمين

#مع_المعلم