بعد اللي الواحد بيسمعه و يشوفه عن عمليات السمنة في مصر من الميديا و الناس و الزملاء و خلافه.. و مقارنة بأي بلد اخر مستحيل ان يحدث بها ما نراه هنا لان فيها هيئات تحمي المواطنين من النصب و لا ترحم أشباه الأطباء .. اللي يهمهم الفلوس بس.. مش مصلحة مرضاهم.. و علي المدي الطويل تسوء سمعة أطباء البلد في عيون الناس جوه و بره ..

فيه شوية نقط مفيدة عاوز اقولها للناس اللي بتفكر تعمل العمليات دي.. او جنبها حد بيفكر يعملها..

 

1. العملية مش تجميل و مش بسيطة .. ممكن تكون بسيطة للجراح الشاطر .. لكن المريض السمين بعكس شكله.. هو مريض ضعيف أصلا و مخزونه للطوارئ قليل و احتماله للمضاعفات اقل بكتير من المريض ذو الوزن الاقل. 

2. الجرّاح المتمكّن ما بيعملش اوفرز. زي ما بنشوف المهازل علي النت .. اوفر الشلّة ..و اوفر عيد الام.. و الهبل دا.. احنا مش كارفور. 

3. لا تنخدعوا بالأحاديث المتلفزة مالم تروها علي الهواء..طالما سعادتك شفت ارقام الطبيب و عنوان عيادته تحت الصورة.. يبقي دا اعلان و هو دافع فلوس.. و فلوس كتير كمان. و الأخ غالبا مشاكله كتير لان سمعته في اللي اشتغلهم مش كويسة فبطلوا يمدحوه لغيرهم..و لما بيقل العدد عنده بينشّط الأمور بالإعلانات. 

4. لو سمعته بيقول  ان النتائج ١٠٠٪؜ و المضاعفات صفر ٪؜ .. دوّر علي غيره فورا .. احنا بنعمل عمليات .. مش بنغسل شعر بالشامبو. 

5. بالنسبة لإعلانات النت و الفيس بوك اللي انتشر كالوباء ..فيها ناس بتتأجّر.. تعمل نفسها عملت العملية.. و تدخل الجروبات وتشكر في واحد معين و انه مافيش غيره..و تاخد نسبه لو العملية اتعملت.. خلوا بالكم. فيه من المرضي كتير بيتخيلوا ان الصفحة المشهورة علي الفيس دليل شطارة الجراح و المصيبة ان فيهم من يعتبرها بديل عن شهادة الدكتوراه ( اعلي و اصعب شهادة في التخصص)..او الماجستير. 

6. مفيش حاجة اسمها أحسن جراح سمنة في مصر.. فيه مجموعة بدأت القصة من زمان و تعبت و سافرت علشان تتعلم الجراحات دي علي اصولها.. و دول في الغالب ما بيدفعوش فلوس لقنوات التليفزيون علشان تطلّعهم.

7. اللي يقولك انا اخترعت العملية دي.. أو اول واحد يشتغل بالجهاز دا.. دا نصّاب.. احنا ما بنخترعش.. احنا بنقلد و نتابع ما يأتي من امريكا و اوروبا..أبحاثهم علي عشرات ألوف المرضي.. و نتائجهم غالبا مش مزورة. و الشركات لما بتنزل اجهزة جديدة.. بتجيلنا علشان نستعملها و نقول رأينا. مفيش حاجة اسمها انا لوحدي في الجراحة دلوقت.  

8. العملية دي مش رخيصة و عمرها ما هاتكون رخيصة. لان الاَلات لوحدها بتكلف حوالي ٢٥-٣٠ الف جنيه الان.. بدون تكاليف الإقامة في المستشفي و اجور الجراح و المساعدين و التخدير. فاللي يقولك ٢٥ أو ٢٨ شامل يبقي بيستعمل الات مقلدة صيني أو غيرها و بيعيد تعقيم الالات اللي بيستعملها في العيانين اللي قبلك و دا بيعرضك لمضاعفات مالهاش داعي .. و بعدين غالبا ها يعملك العملية في حمام بيتقال عليه مركز أو مستشفي..ما تغامرش بحياتك. 

9. لو ممعاكش.. روح مستشفيات جامعية فقط.. بتتعمل هناك بأسعار الاَلات فقط..لكن عيوبهم قائمة الانتظار . و اللي بيعملها جراح متدرب لكن تحت إشراف استاذ. مش ها تتأذي أبدا هناك. 

10. عمليات السمنة هي: تكميم (استئصال 4/5 المعدة). و تحويل مسار بانواعه. غير كدة يبقي نصب. 

11. التدبيس (VBG) انتهي من العالم من ٢٠ سنة و لو أتعمل دلوقت يبقي نصب و حرام. 

12. حزام المعدة بيحتضر و العالم كله ها يبطله بعد فترة قريبة.

13. التدكيك أو الكشكشه غير مفيدة علي المدي الطويل. لانها مش consistent. بمعني ان الحجم الجديد للمعدة مختلف من جراح لآخر  .. و من مريض لاخر ..و بالتالي ممكن تنزل وزن بسيط أو كتير أو تفشل. دا بالاضافة ان محدش يعرف ايه اللي ممكن يحصل لجدار المعدة المدكك بعد وقت طويل من الاحتقان و نقص التروية الدموية المستمر. امريكا و اوروبا تمنع اجراء هذه الجراحة. 

14. عملية الفراشة.. نصب جدا. و سببت مضاعفات خطيرة لناس كتير. بالاضافة الي ان اصلاحها محفوف بخطورة كبيرة. 

15. تضييق المعدة بمنظار الفم.. تحت التجارب. و غالي جدا و جايز تنزل ٣ كيلو بس ..زائد انه مش معمول لاوزان عالية علي الإطلاق. 

16. حقن البوتوكس في المعدة نصب. 

17. العملية بالمنظار فقط. ممكن المريض يتحول لفتح تحت ظروف معينة. و حسب قدرة و خبرة كل جراح. بس المنظار اولا. 

18. بنج العمليات دي بنج كلي فقط. و ممكن معاه قسطرة رفيعة في الظهر اسمها ابيديورال (epidural). علشان تطيل فترة عدم الإحساس بالالم في ناس معينين. 

19. البنج النصفي لوحده خطر و الموضعي اخطر في هذا النوع من الجراحات. الجراح بيقامر بحياة مريضه لو اشتغل بهذا النوع من البنج. 

20. أرجوك لا تُجرِي الجراحة في مستشفيات تحت السلم مع جراحين مبتدئين. غالبا ها تحصلّك مضاعفات قد تكون خطيرة جدا .. المستشفي لازم يكون فيها غرفة عمليات مجهزة بترابيزة تتحمل أوزان عالية و رعاية مركّزة ..و بنك دم.. و معمل تظهر نتائجه في دقائق..و قسم اشعة به اشعة مقطعية و كل دا جاهز للعمل ٢٤ ساعة. لو مفيش دا ..لازم تعرف انه حتي لو صاحبك عملها هناك و عدي بسلام.. ممكن انت ماتعديتش و تبقي بتقامر بحياتك.

21. أرجوك لا تجري عملية سمنة و معاها عملية تانية. .زي شد البطن او شفط الدهون. اترك جسمك يركز الالتئام في حاجة واحدة. شفنا مصايب كتير من ورا العبط دا. 

22. موضوع الروبوت دا فيه كلام كتير و لكن الاكيد انه لن يضيف فائدة كبيرة للمريض و مكانه في جراحات الاعادة و ليست الجراحة لاول مرة. و الجراح بيعرضه علي المريض علشان يكسب اكتر. و مستحيل تلاقي جراح بيعرضه علي مريض امكانياته المادية محدودة. 

23. لازم تعرف ان الجراحة لوحدها ليست نهاية المطاف و ها تخس لوحدك بدون اي مجهود منك. بالعكس.. هي بداية لحياة تانية اكتر صحة و فيها التزام بالتعليمات و متابعة مستمرة مع الجراح او استشاري التغذية بتاعك لمدد طويلة. ببساطة .. الجراحة بتشيل من عليك ٧٠٪؜ من مجهود و التزام الدايت من غير جراحة. لكن لسه هناك جزء و مسئولية عليك.

24. باللون المعدة معمول للسمنة البسيطة و هناك نسبة لا يستهان بها من الاضطرار الي ازالته بعد وضعه بيومين او ثلاث نتيجة الم المعدة الشديد و القئ المستمر..  دا اضافة الي انه لازم يتشال بعد سنة علي الاكثر. و بالتالي ممكن ترجع تزيد في الوزن تاني. 

25. كلمة اخيرة للنقابة.. لازم شهادةاستشاري جراحة المناظير و السمنة تتعلق في العيادات. و يكون لها مسوغات واضحة و دقيقة.