نيروز الإخبارية : كتبها : ابو عصام عبندة. نيروز الاخبارية : ساقطع يد كل من يتطاول على جيوبكم يا اخواني و اخواتي ... لسوف اكون صوت الحق لديكم ... لسوف اكون خير من يمثلكم اخواتي و اخواني و ابنائي ... ساعمل على كشف الفساد الذي اصبح يتوغل الى جيوبكم ... (وزع كنافه ياعمي على الجميع ) ... ساقوم بملاحقة القضايا المتعلقه ... ساعمل على توظيف ابنائي العاطلين عن العمل .... سيكون بيتي مفتوحا لاي مشتكي او محتاج طلب ... رقم تلفوني لم و لن استبدله ان رايتموني غير ذلك لا تبايعوني ( شرب ياعمي صب لبن ) ابو فلان شلونك طمني عنك ... سمعت انه عندك ابن و هو المعيل الك وقاعد من غير شغل ... توكل على الله اول ما اكون تحت القبه رح يتوظف على طول .... ام افلان كيف صحة ابو فلان ... سمعت انه مريض ... توكلي على الله اول اشي رح اعمله رح اجيب تامين صحي لحبيبي واخوي ابو فلان . امسكي خلي هذا المبلغ معك ... مش انا بتعتبريني مثل اخوكي .. احنا اهل و قرايب و نسايب و معارف ... يا ام فلان للتذكير لا تنسيني من خواتك و ازواجهم و اولادهم و من معارفك ترى انا عارفك اذا نويتي فعلتي و انت اخت رجال و ابوكي الله يرحمه كان اخو ابوي لروح بالروح و انا بذكر و انت صغيره لما كانت حياة امك الله يرحمها تعملك لجدوله و كنا و احنا صغار نشدك منها لانه كنا نغار منك ... سقى الله على هذيك الايام ... ما بدك وصاه يا ام فلان ... و انا مش ناسبي ابو فلان . اهلين دكتور هلا و الف غلا بالحبيب ... طبعا رح اكون صادق و امين ورح اكون صوت الحق لكل هاي الجماهير المجتمعه ... و مش رح استحي او اخجل من اي مسؤول مهما كان بالحق . اهلا بريحة الحبايب طمني عنك عمي شلونك و شلون ابوك ... مات الله يرحمه متى ... بتصدق اني ما سمعت منتى عارف مشاغل الحياة و همومها ... وانت شو بتعمل شو بتشتغل ولا اشي معقول شب طويل عريض قاعد عطال بطال ... معاملة كشك على رصيف الجامعه ... ابشر يا عمي و لا يهمك اصلا المسؤول عن هذا الموضوع صديقي الروح بالروح ... طبعا انت عارف لما انجح رح يكون وضعي غير و اقوى ... وقتها بحكي معه بين قويه و رح اجيبلك الموافقه على باب بيتك و اشرب عندكم قهوه ... خذ يا عمي خلي هالمصاري معك مشي حالك فيهم كم يوم .... عيب انا بمثابة ابوك يا عمي الله يرحم ابوك لما كان يشتريلنا حلو من الدكانه .... بس يا عمي بدي همتك معي انت و اصحابك لا تنسى . هلا يا غالي ... اكلت كنافه ... وين بكير خلينا نتعلل سوى ماشي مابدي اعطلك ... استنى شو ... يا عمي جيب لعمك صدر كنافه خليه يحلي بيته بنجاحي و لا شو ما بدك تحلي ... عارفك ما بتقصر ... ولو يا رجل احنا اهل . لو تعرفي يا مره كم شعبنا ساذج ... بكلمتين بلفت عقلهم و وعدتهم بكل متطلباتهم .... بشو رح اعمل بمطالبهم بكره بس ينتخبوتي بنرحل على العاصمه و بغير رقم التلفون و بعد اربع سنين يخلق الله مالا تعلمون . طبعا كل شباب المنطقه بذبحوا حالهم بالتركيض و الهتافات و الصياح مشان المرشح الفلاني . ونسوان المنطقه بتصير تحكي عن امجاده و بطولاته و الموظف بصير يتاخر عن دوامه مشان يركض و الي بوخذ اجازه عشان يركض ... و الكل يفزع للمرشح ... هذا قرابتي لو تشوف شو عمل على مستوى عشيرتي و قتها بعرف ليش بركض و بتعب . هذا سيناريو الانتخابات عنا . و مثل ما انتوا شفتوا هذا الي صار فينا .... ما في داعي لكثرة الشرح . و هاي نتيجة فزعتنا الهمجيه و تركيضنا . و ما زلنا داخل الزجاجه و لم نخرج من عنقها و سلامتكوا يا ايها الشعب .